Is-soċi japprovaw il-Programm tal-Festa tal-75 Anniversarju mill-Inkurunazzjoni

Il-Ħadd li għadda, waqt Laqgħa Ġenerali tal-Għaqda Madonna tal-Grazzja Banda San Mikiel, is-soċi approvaw uffiċjalment il-programm tal-attivitajiet għall-festa ta’ din is-sena, li se tkun waħda storika għal Ħaż-Żabbar.

Din is-sena, il-komunità Żabbarija se tkun qed tiċċelebra l-75 anniversarju mill-Inkurunazzjoni tal-Kwadru Titulari tal-Madonna tal-Grazzja, ġrajja li tibqa’ mnaqqxa fil-memorja kollettiva tal-poplu tagħna. Għal din l-okkażjoni speċjali, l-Għaqda ħejjiet programm estensiv ta’ attivitajiet reliġjużi, kulturali u mużikali, flimkien ma’ numru ta’ inizjattivi u sorpriżi li se jagħmlu din il-festa waħda tassew memorabbli.

Il-programm jibda uffiċjalment nhar is-7 ta’ Awwissu bl-Akkademja Mużikali, li se ssir fis-Santwarju tal-Madonna tal-Grazzja. Din se toffri esperjenza artistika unika f’ambjent mill-isbaħ u se tfakkar b’mod dinjituż dan l-anniversarju storiku.

Matul il-ġimgħat ta’ wara se jkomplu jittellgħu diversi attivitajiet li jilħqu lill-familja kollha, filwaqt li l-festa se tkun imżejna b’inizjattivi ġodda u investimenti li jkomplu jsaħħu t-tradizzjoni u l-identità tal-festa Żabbarija.

L-Għaqda tistieden lis-soċi, lill-partitarji u lill-poplu kollu ta’ Ħaż-Żabbar biex jingħaqdu magħha f’dawn iċ-ċelebrazzjonijiet straordinarji u jagħmlu minn dan il-75 anniversarju okkażjoni li tibqa’ mfakkra għal ħafna snin oħra.