Qattgħu Santa Marija jżejnu Ħaż-Żabbar

Ilbieraħ, f’jum il-festa ta’ Santa Marija, tim sabiħ ta’ voluntiera għażel li jqatta’ ġurnata sħiħa jaħdem b’ħeġġa għall-festa tant għażiża għalina.

Minn kmieni filgħodu, żgħażagħ u oħrajn akbar, ingħaqdu flimkien sabiex iżejnu diversi nħawi ta’ Ħaż-Żabbar u jkomplu jħejju lil Beltna għall-jiem tant mistennija tal-festa.

Ftit ftit, Ħaż-Żabbar beda jilbes il-libsa ħadra tiegħu; il-kulur tal-maġġoranza.

Kienet ġurnata oħra ta’ ħidma volontarja, għaqda u dedikazzjoni, fejn kulħadd ta sehmu biex jittella’ ħafna xogħol fi ftit sigħat.

Il-preparamenti issa qed jidħlu fl-aqwa tagħhom hekk kif il-festa tinsab wara l-bieb. Bħal-lum ġimgħa, it-toroq ta’ Ħaż-Żabbar jimtlew bil-briju għall-ewwel marċ: il-Marċ il-Kbir ta’ San Mikiel!

Il-festa riesqa u Ħaż-Żabbar diġà qed jilbes l-aqwa tiegħu!