Min kien Alessio Erardi?

Alessio Erardi kien wieħed mill-aktar artisti Maltin distinti tal-perjodu Barokk. Imwieled fl-1669, kien iben il-pittur magħruf Stefano Erardi, mingħandu kiseb l-ewwel tagħlim artistiku. Bejn l-1695 u l-1701 qatta’ madwar ħames snin u nofs f’Ruma, fejn kompla jistudja u ġie influwenzat mill-arti Barokka Taljana, b’mod partikolari mill-istil ta’ Mattia Preti. Interessanti li, għalkemm hu magħruf bħala Alessio Erardi, ir-reġistru tal-magħmudija tiegħu juri li ngħata l-isem Giuseppe, filwaqt li "Alessio" kien l-isem li bih sar magħruf matul ħajtu u fl-istorja tal-arti Maltija. 

Meta rritorna Malta, Alessio Erardi ħalla warajh ġabra estensiva ta’ xogħlijiet li llum jinsabu f’numru kbir ta’ knejjes u binjiet storiċi madwar il-gżejjer Maltin. Fost l-aktar opri magħrufa tiegħu hemm il-kwadru titulari tal-Madonna tal-Grazzja fis-Santwarju ta’ Ħaż-Żabbar, ikkummissjonata fl-1715 minn Bernardo Piscopo Macedonia, il-pitturi tal-knisja tal-Vitorja fil-Belt Valletta, kif ukoll xogħlijiet fil-Konkatidral ta’ San Ġwann, fil-Kolleġġjata ta’ San Lawrenz fil-Birgu, fil-Mosta, Ħal Lija u l-Mellieħa. 

L-istil ta’ Erardi huwa kkaratterizzat minn kompożizzjonijiet armonjużi u espressjonijiet mimlijin devozzjoni. Huwa rnexxielu jgħaqqad il-qawwa drammatika tal-Barokk ma’ eleganza klassika, u b’hekk serva ta’ pont bejn il-ġenerazzjoni ta’ missieru u dik ta’ pitturi Maltin tas-seklu tmintax, fosthom Gio Nicola Buhagiar. 

Miet fl-1727, iżda l-wirt artistiku tiegħu jibqa’ wieħed mill-aktar importanti fl-istorja tal-arti Maltija. Il-pitturi tiegħu għadhom sal-lum jixhdu l-ħila teknika, il-fond spiritwali u l-kontribut sinifikanti tiegħu għall-iżvilupp tal-arti Barokka f’Malta.